Koordinatorja antikorrupsion në Partinë e Lirisë, Brisida Shehaj, denoncoi dje sesi 1 vit e gjysmë nga kalimi i afatit kompania koncesionare ende s’ka dorëzuar veprën e inceneratorit. Ndërkohë që Ministria e Infrastrukturës ka bërë pagesë tjetër.
Por këto nuk ishin të vetmet parregullsi që u publikuan dje.
Shehaj tha se kompania e inceneratorit ka marrë kredi, duke vendosur garanci paratë e shqiptarëve.
“Nëse flasim sot, bëhet një vit e gjysmë. Nuk firmoset situacioni përfundimtar thuhet. Kompania në 8 mars kthen përgjigje, ky është moment shumë skandaloz. I drejtohet ministrisë, supervizorit, ‘shoqëria ka hasur disa ditë vonesë në fazën e testimeve të veprës’, pra, një vit pasi kishte mbaruar vepra, kompania koncesionare njofton Ministrinë e Infrastrukturës e thotë janë larguar kompanitë e huaj që bënin punimet dhe stafet e huaja s’ka kush të vejë në punë inceneratorin e Fierit. Supervizori i kthen përgjigje në 17 mars, i thotë na tregoni nëse janë të gjitha elementët e impiantit.
Na demonstroni proceset që po ndiqni. Kërkohet grafik i saktë i montimit dhe kolaudimit të objektit. Paska pasur dhe një vizitë në impiant se në letër thuhet ‘pas vizitës në impiant u vërejt se ka nevojë për një mirëmbajtje më të mirë’.
Pra, ajo vepër po amortizohet se koncesionari nuk e mirëmban. ‘Jeni me vonesë në përmbushjen e detyrimeve kontraktuale’, thuhet në letër. Ky moment kulmon me pagesat që ministria kaloi 1.8 milionë euro sërish këtij koncesionari”, tha Shehaj.